ممبئی(ویب ڈیسک) ممبئی کے مغربی علاقے ملاڈ میں مائنڈ اسپیس کے قریب جھاڑیوں کے درمیان بیگ میں بند 20سالہ ماڈ ل گرل کی لاش برآمد ہونے سے سنسنی پھیل گئی۔ بیگ ملنے کے 4گھنٹے کے اندر ہی بانگورنگر پولیس نے قتل کے الزام میں مانسی کے دوست مزمل سعید کو گرفتار کرلیا جو ملت نگر مغربی اندھیری کا رہائشی ہے۔
بھارتی میڈیا کے مطابق سوٹ کیس سے برآمد ہونے والی لاش کی شناخت مانسی ڈکشٹ کے نام سے ہوئی ہے، مانسی کا تعلق بھارتی ریاست راجستھان سے تھا جو ممبئی ماڈل بننے کے لیے آئی تھی اور شوبز کی دنیا میں قدم جمانے کی کوشش کررہی تھی۔بنگور نگر پولیس کا کہنا ہے کہ ملزم مزمل سید اور مانسی کی ملاقات انٹرنیٹ پر ہوئی تھی اور دونوں گزشتہ روز دوپہر میں ممبئی کے علاقے اندھیری میں مزمل کے اپارٹمنٹ میں ملے تھے، بعد ازاں مزمل اور مانسی میں کسی بات پر بحث ہوئی اور مزمل نے کسی وزنی چیز سے مانسی پر وار کیا اور پھر اس کا گلا دبا کر اسے مارڈالا۔اس کے بعد مزمل سید نے مانسی کی لاش سوٹ کیس میں ڈالی اور ایک ٹیکسی میں سوٹ کیس کو ملاڈ ریلوے اسٹیشن لے گیا اور لاش پھینک کر وہاں سے فرارہوگیا، یہ ساری کارروائی رات 3 بجے سے 4 بجے کے درمیان ہوئی۔پولیس کو اس کارروائی کا ٹیکسی ڈرائیور کے ذریعے پتہ چلا تھا جسے مزمل سید نے بلایا تھا، ٹیکسی ڈرائیور نے سید کو بیگ پھینک کر رکشے میں واپس جاتے ہوئے دیکھا تھا، جس کے بعد اس نے پولیس کو فون کیا اور اس ساری کارروائی کے متعلق بتایا، پولیس فوراً موقع پر پہنچی اور سوٹ کیس سے ماڈل کی لاش برآمد کرلی۔بعد ازاں سی سی ٹی وی فوٹیج کی مدد سے پولیس نے مزمل کو گرفتار کرلیا، ڈپٹی کمشنر آف پولیس سنگرامسن کا کہنا ہے کہ ہم نے کیس کی ایف آئی آر درج کرلی ہے، ملزم سید کو منگل کے روز یعنی آج عدالت میں پیش کیاجائے گا۔ پولیس کا کہنا ہے کہ مزمل سید نے ماڈل مانسی ڈکشٹ کے قتل کا اعتراف کرلیا ہے۔ جب کہ ماڈل کی لاش پوسٹ مارٹم کے لیے آٹوپسی روانہ کردی گئی ہے۔