اسلام آباد (ویب ڈیسک) اقوام متحدہ نے وزیر اعظم پاکستان عمران خان کو ایک اور بڑی ذمہ داری سونپ دی ، وزیراعظم عمران خان دنیا سے جنسی استحصال کے خاتمے کیلئے اقوام متحدہ کے ’’ سرکل آف لیڈر شپ ‘‘ کا حصہ بن گئے ہیں۔ جمعرات کو اقوام متحدہ سے جاری

بیان میں واضح کیا گیا ہے کہ وزیراعظم عمران خان سرکل آف لیڈر شپ میں شمار ہونے والے دنیا کے ساتویں حکمران یا وزیراعظم ہیں۔ اقوام متحدہ کے سرکل آف لیڈر شپ کے فورم کے ذریعے جنسی استحصال کے خاتمے کیلئے اقدامات کو موثر بنایا جاتا ہے اور اس طرح کے واقعات کی فوری رپورٹنگ اور انسداد کے لئے اقدامات بھی تجویز کیے جاتے ہیں ۔واضح رہے کہ پاکستان سمیت دنیا بھر میں خواتین کے ساتھ زیادتی اور انہیں ہراساں کیے جانے کے واقعات عام ہیں ۔ ہر ملک میں قانون نافذ کرنے والے ادارے اسے خوفناک رجحان کے سدباب کے لیے کام کر رہے ہیں مگر یہ وبا بڑھتی جا رہی ہے ، پاکستان میں اس ضمن میں کوششوں کو کامیاب بنانے کے لیے اقوام متحدہ نے عمران خان کو سرکل آف لیڈر شپ کا حصہ بنایا ہے جس میں دنیا کے متعدد ممالک کے سربراہان شامل ہیں۔ اس سرکل میں شامل سربراہان مملکت اپنے اپنے ممالک میں خواتین کو ظلم و زیادتی اور ہراسگی سے بچانے کے لیے کے لیے نہ صرف تجاویز پیش کرتے ہیں بلکہ دیگر ممالک کے تجربات سے بھی فائدہ اٹھاتے ہیں اسکے ساتھ ساتھ اقوام متحدہ میں خواتین کے حوالے سے قائم ذیلی ادارے میں پیش کی جانیوالی تجاویز پر اپنے ممالک میں عملدرآمد یقینی بنانے کے لیے اقدامات بھی اٹھائے جاتے ہیں ۔